Mekapati Goutham Reddy: గౌతమ్‌రెడ్డి హఠాన్మరణంపై ప్రముఖుల దిగ్భ్రాంతి

హైదరాబాద్: ఏపీ మంత్రి మేకపాటి గౌతమ్‌రెడ్డి హఠాన్మరణంపై పలువురు రాజకీయ ప్రముఖులు, ఆయన సన్నిహితులు విచారం వ్యక్తం చేశారు. ఆయనతో తమకున్న సంబంధాన్ని గుర్తు చేసుకున్నారు. ఆయన ఆత్మకు శాంతి చేకూరాలని ప్రార్థించారు. గౌతమ్‌రెడ్డి కుటుంబ సభ్యులకు తమ ప్రగాఢ సానుభూతి తెలిపారు. 

‘‘గౌతమ్‌రెడ్డి తాత సమయం నుంచి ఆ కుటుంబంతో సాన్నిహిత్యం ఉంది. నేనంటే ఎంతో అభిమానం చూపేవారు. గౌతమ్‌రెడ్డి పరమపదించడం అత్యంత విచారకరం. గౌతమ్‌ ఎంతో సౌమ్యులు, సంస్కారవంతులు. ప్రజా సమస్యల పట్ల అవగాహన, పని పట్ల నిబద్ధత కలిగిన నాయకుడు’’- ఉప రాష్ట్రపతి వెంకయ్యనాయుడు

‘‘తొలినాళ్ల నుంచి సుపరిచితుడైన యువనాయకుడు గౌతమ్‌రెడ్డి. మంత్రివర్గ సహచరుడిని కోల్పోవడం మాటల్లో చెప్పలేను. గౌతమ్‌రెడ్డి కుటుంబసభ్యులకు నా ప్రగాఢ సానుభూతి’’
- ఏపీ సీఎం జగన్‌

‘‘మంత్రి మేకపాటి గౌతమ్‌రెడ్డి మృతి కలచివేసింది. ఎంతో భవిష్యత్‌ ఉన్న నాయకుడి మృతి బాధాకరం. గౌతమ్‌రెడ్డి కుటుంబసభ్యులకు ప్రగాఢ సానుభూతి’’

- తెదేపా అధినేత చంద్రబాబు

‘‘చిన్న వయసులోనే గౌతమ్‌రెడ్డి చాలా గొప్ప పేరు తెచ్చుకున్నారు. గౌతమ్‌ మరణ వార్త బాధించింది. చిన్న వయస్సులోనే మనల్ని వదిలి వెళ్లడం బాధాకరం. మంత్రిగా చురుగ్గా పని చేసి మంచి పేరు తెచ్చుకున్నారు. నిన్నటి వరకు రాష్ట్రానికి పెట్టుబడులు తెచ్చేందుకు కృషి చేశారు. ఆయన ఆధ్వర్యంలో ఆంధ్రప్రదేశ్‌ పెట్టుబడి రంగంలో అభివృద్ధి చెందింది’’

- మంత్రి పెద్దిరెడ్డి రామచంద్రారెడ్డి

‘‘ఓ మంచి స్నేహితుడు, అన్నను కోల్పోయాను. ఆయన హఠాన్మరణం చాలా బాధకరం’’- మంత్రి అనిల్‌ కుమార్‌

‘‘గౌతమ్‌రెడ్డి వివాద రహితుడు. నాకు బంధువు. నా బంధువు నిశ్చితార్థ కార్యక్రమంలో రాత్రే కలిశా. మచ్చ లేకుండా మంత్రిగా పని చేశారు. అలాంటి గౌతమ్‌రెడ్డి ఇకలేరన్న వార్త నన్ను చాలా బాధించింది. చిన్న వయసులోనే చనిపోవడం చాలా బాధ కలిగించింది’’- సోమిరెడ్డి చంద్రమోహన్‌రెడ్డి

‘‘మేకపాటి గౌతమ్‌రెడ్డి మరణవార్త విని షాక్‌కు గురయ్యాను. ఆయన కుటుంబసభ్యులకు నా ప్రగాఢ సానుభూతి తెలియజేస్తున్నాను. ఆయన ఆత్మకు శాంతి చేకూరాలని భగవంతుడిని కోరుకుంటున్నాను’’
- తెలంగాణ మంత్రి కేటీఆర్‌

‘‘ఏపీ పరిశ్రమల శాఖ మంత్రి మేకపాటి అకాల మరణం నన్ను కలచివేసింది. మంచి రాజకీయ భవిష్యత్ ఉన్న నేత చిన్న వయసులోనే కన్ను మూశారు. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నాను. ఆయన కుటుంబ సభ్యులకు నా ప్రగాఢ సానుభూతి’’
- టీపీసీసీ అధ్యక్షుడు రేవంత్ రెడ్డి

‘‘చిన్న వయసులోనే గౌతమ్‌రెడ్డి మృతి బాధాకరం. నిన్నటి వరకు ఏపీలో పెట్టుబడుల కోసం దుబాయ్‌లో పర్యటించారు. మేకపాటి కుటుంబానికి నా ప్రగాఢ సానుభూతి తెలియజేస్తున్నాను. గౌతమ్ రెడ్డి మరణం పార్టీకి, ప్రజలకు తీరని లోటు’’

- మంత్రి ఆళ్ల నాని

‘‘మంత్రి గౌతమ్ రెడ్డి మృతి చాలా బాధాకరం. ఆయన కుటుంబ సభ్యులకు నా ప్రగాఢ సానుభూతి’’ - మంత్రి తలసాని శ్రీనివాస్ యాదవ్