Sundara Naidu: సుందరనాయుడి భౌతికకాయానికి ప్రముఖుల నివాళులు

చిత్తూరు: పౌల్ట్రీ పరిశ్రమ మార్గదర్శి, బాలాజీ హేచరీస్‌ అధినేత డాక్టర్‌ ఉప్పలపాటి సుందర నాయుడి మృతి తీరనిలోటని పలువురు ప్రముఖులు ఆయన సేవలను గుర్తు చేసుకున్నారు. చిత్తూరు నగరం సుందరనగర్‌లోని సుందరనాయుడు స్వగృహంలో ఆయన భౌతికకాయానికి నివాళులు అర్పించారు. సుందరనాయుడి అంత్యక్రియల్లో భాగంగా రెండో రోజైన ఇవాళ సినీ నటుడు మోహన్‌బాబు, మాజీ మంత్రి అమర్‌నాథ్‌రెడ్డి, అమరరాజా గ్రూప్‌ సంస్థల ఛైర్మన్‌ గల్లా రామచంద్రనాయుడు, అమరరాజా ఆస్పత్రి ఎండీ గౌరినేని రమాదేవి, చిత్తూరు ఎమ్మెల్యే శ్రీనివాసులు ఇతర ప్రముఖులు సుందరనాయుడు భౌతికకాయానికి నివాళులు అర్పించారు. సుందరనాయుడు కుమార్తె, మార్గదర్శి ఎండీ శైలజను ఓదార్చారు. వేల మంది రైతులు, యువతను కోళ్ల పరిశ్రమ వైపు నడిపించి వారి జీవితాల్లో వెలుగులు నింపిన మార్గదర్శి సుందరనాయుడు అని కొనియాడారు.