Mars: వీడియోలు, ఫొటోలను పంపించిన రోవర్‌

బీజింగ్‌: అంగారకుడిపై గత నెల 15న దిగిన చైనా ఉపగ్రహం తైన్ వెన్-1కు చెందిన రోవర్ ఝురాంగ్ అక్కడి నుంచి వీడియోలు, ఫోటోలను పంపింది. రోవర్‌కు అమర్చిన కెమెరా అంగారకుడిపై దృశ్యాలను చిత్రీకరించి భూమిపైకి పంపించింది. పారాచూట్ అక్కడి ఉపరితలాన్ని తాకడం.. రోవర్ దిగిన ప్రదేశం నుంచి దూరంగా ప్రయాణించడానికి సంబంధించిన దృశ్యాలను ఈ కెమెరా బంధించింది. అరుణగ్రహంపై నీరు, మంచు ఉండటంపై మూలాలను శోధించేందుకు చైనా చేపట్టిన ఈ ఉపగ్రహ ప్రయోగంలో భాగంగా రోవర్‌ ఝరాంగ్‌ 90 రోజులు ప్రయాణిస్తుందని అంచనా. ఇందులో ఇప్పటికే 42 రోజులు పూర్తయ్యింది. 236 మీటర్లు ప్రయాణించింది.