Chitrakoot: నిందితులను వెంటాడిన పీడకలలు.. చోరీ చేసిన విగ్రహాల అప్పగింత!

లఖ్‌నవూ: ఉత్తర్‌ప్రదేశ్‌లో విచిత్ర ఘటన వెలుగులోకి వచ్చింది. ఆలయ విగ్రహాలు చోరీ చేసిన నిందితులు.. అనంతరం తమను పీడకలలు వేధిస్తున్నాయని పేర్కొంటూ వాటిని తిరిగి ఆలయ పూజారి ఇంటి సమీపంలో వదిలేయడం గమనార్హం. పోలీసుల వివరాల ప్రకారం.. చిత్రకూట్‌ జిల్లా తరౌన్హాలోని ఓ పురాతన బాలాజీ ఆలయం నుంచి మే 9న రాత్రి రూ.కోట్ల విలువైన 16 అష్టధాతు విగ్రహాలు చోరీకి గురయ్యాయి. దీనికి సంబంధించి ఆలయ పూజారి మహంత్ రామ్‌బాలక్ పోలీసులకు ఫిర్యాదు చేశారు. ఈ మేరకు గుర్తుతెలియని వ్యక్తులపై కేసు నమోదు చేసినట్లు సదర్ కొత్వాలి కార్వీ స్టేషన్ అధికారి రాజీవ్కుమార్ సింగ్ తెలిపారు.

ఈ క్రమంలోనే చోరీకి గురైన 16 విగ్రహాల్లో 14 ఆదివారం మహంత్ నివాసానికి సమీపంలో ఒక గోనె సంచిలో లభ్యమయ్యాయి. ఈ క్రమంలో ఓ లేఖ కూడా బయటపడినట్లు అధికారి తెలిపారు. ‘చోరీ ఘటన అనంతరం రాత్రిపూట పీడ కలలు వస్తున్నాయి. నిద్ర పట్టడం లేదు. అందుకే భయంతో ఈ విగ్రహాలను తిరిగి ఇస్తున్న’ట్లు అందులో రాసి ఉందని చెప్పారు. ఆ విగ్రహాలను స్వాధీనం చేసుకుని, భద్రపరిచామని.. నిందితులను పట్టుకునే దిశగా దర్యాప్తు ముమ్మరం చేసినట్లు వెల్లడించారు.