AP PRC: ఉద్యోగులకు చేయగలిగినంత చేశాం: సీఎం జగన్‌

అమరావతి: రాష్ట్ర ప్రభుత్వానికి ఉద్యోగుల సహకారం ఉంటేనే ఏదైనా చేయగలుగుతామని ఏపీ సీఎం జగన్‌ అన్నారు. కొవిడ్‌, ఆర్థిక ఇబ్బందులు ఉన్న పరిస్థితుల్లోనూ ఉద్యోగులకు చేయగలిగినంత చేశామని చెప్పారు. తాడేపల్లి క్యాంపు కార్యాలయంలో సీఎంతో పీఆర్సీ సాధన సమితి నేతలు భేటీ అయ్యారు. ఈ సందర్భంగా సీఎం జగన్‌ మాట్లాడారు. ఉద్యోగులు ఎవరూ భావోద్వేగాలకు పోవద్దని.. అలాంటి పరిస్థితి ఏదైనా ఉంటే ప్రభుత్వంతో చర్చించాలని సూచించారు. ‘నేను మనస్ఫూర్తిగా నమ్మేదొకటే.. మీరు లేకపోతే నేను లేను’ అని ఈ సందర్భంగా ఉద్యోగులను ఉద్దేశించి సీఎం వ్యాఖ్యానించారు. 

సీపీఎస్‌ విషయంలో ఉద్యోగులకు సరైన పరిష్కారం చూపిస్తామని.. దీనిపై ఎలా ముందుకెళ్లాలనేదానిపై చాలా స్టడీ చేస్తున్నామని జగన్‌ చెప్పారు. ఆ సమస్య పరిష్కారంలో ఉద్యోగ సంఘాలనూ భాగస్వామ్యం చేస్తామని.. ఆ తర్వాతే నిర్ణయం తీసుకుంటామన్నారు. కాంట్రాక్ట్‌ ఉద్యోగుల అంశంలో రోస్టర్‌ పద్ధతి ప్రకారం చర్యలు చేపడతామని.. దీనిపై ఇప్పటికే ఆదేశాలు ఇచ్చామని వివరించారు. సుమారు 30వేల మంది ఎస్జీటీలకు స్కూల్‌ అసిస్టెంట్లుగా పదోన్నతి ఇస్తున్నామన్నారు. ప్రభుత్వం చాలా సానుకూల దృక్పథంతో ముందుకెళ్తోందని.. భవిష్యత్‌లో ఆ ఫలాలు వస్తాయని చెప్పారు. మంత్రుల కమిటీకి ఉద్యోగ సంఘాల నిర్ణయాలు సంతోషాన్ని ఇచ్చాయని భావిస్తున్నట్లు సీఎం అన్నారు.