స్మార్ట్‌ మీటర్లపై అపోహలొద్దు: సీఎండీ శ్రీకాంత్‌

అమరావతి: ఉచిత విద్యుత్‌ నగదు బదిలీపై రైతులకు ఎలాంటి అపోహలు వద్దని ఏపీ ట్రాన్స్‌కో సీఎండీ శ్రీకాంత్ తెలిపారు. మీటర్లకు సంబంధించి రైతులపై ఎలాంటి భారం పడదని ఆయన వెల్లడించారు. మీటర్లలో ఏ సమస్యలు తలెత్తినా విద్యుత్ సంస్థలే మీటర్లను ఉచితంగా ఏర్పాటు చేస్తాయని తెలిపారు. మీటర్లు అపహరణకు గురైతే రైతు సంబంధిత డిస్ర్టిబ్యూషన్‌ కంపెనీల అధికారుల దృష్టికి తీసుకువెళ్లాలని సూచించారు. దీనిపై సంబంధిత డిస్కంల అధికారులు చర్యలు తీసుకోవడంతో పాటు రైతు నుంచి ఎలాంటి రుసుము వసూలు చేయరని శ్రీకాంత్‌ తెలిపారు. 
రీడింగ్ రికార్డింగ్‌కు సంబంధించి డిస్ర్టిబ్యూషన్‌ కంపెనీలు అవసరమైన చర్యలు తీసుకుంటున్నాయని వివరించారు. సిబ్బందితో పాటు స్పాట్‌ బిల్లింగ్‌ ఏజెన్సీల ద్వారా రికార్డింగ్‌లు తీసుకుంటున్నట్లు స్పష్టం చేశారు. స్మార్ట్‌ మీటర్లను సాధ్యమైనంతవరకు బిగించాలని ప్రతిపాదించామని, దీనికి సంబంధించి ఎలాంటి సమస్య తలెత్తదని సీఎండీ తెలిపారు.