TS News: జిల్లా కేడర్‌ ఉద్యోగుల పోస్టింగ్‌ల ప్రక్రియ పూర్తి: సీఎస్‌

హైదరాబాద్‌: రాష్ట్రపతి ఉత్తర్వులు 2018కి అనుగుణంగా జిల్లా కేడర్‌ ఉద్యోగుల పోస్టింగ్‌ల ప్రక్రియ పూర్తయిందని రాష్ట్ర ప్రభుత్వం తెలిపింది. 22,418 మంది ఉపాధ్యాయులకు గాను సాయంత్రం 6గంటల వరకు 21,800 మంది కొత్త స్థానాల్లో చేరారని, మిగిలిన ఉపాధ్యాయులు కూడా అర్ధరాత్రి లోపు విధుల్లో చేరుతారని పేర్కొంది. 13,760 మంది జిల్లా స్థాయి ఇతర ఉద్యోగులు కూడా కొత్త స్థానాల్లో చేరినట్టు తెలిపింది. జోనల్‌, మల్టీజోనల్‌ కేడర్‌ ఉద్యోగుల కేటాయింపు ప్రక్రియ పూర్తయిందన్న రాష్ట్ర ప్రభుత్వం.. రేపటి వరకు వారి పోస్టింగ్‌ల ప్రక్రియకూడా పూర్తవుతుందని పేర్కొంది. విస్తృత ప్రక్రియను స్వల్పకాలంలోనే పూర్తి చేయడం గొప్ప విషయమన్న ప్రభుత్వ ప్రధాన కార్యదర్శి సోమేశ్‌ కుమార్‌.. పారదర్శకంగా ప్రక్రియ పూర్తి చేసిన అన్ని శాఖల కార్యదర్శులు, కలెక్టర్లు, అధికారులకు ధన్యవాదాలు తెలిపారు. పక్రియ పూర్తి చేసేందుకు మార్గనిర్దేశం చేసిన ముఖ్యమంత్రి కేసీఆర్‌ కు కృతజ్ఞతలు చెప్పారు. 2018 రాష్ట్రపతి ఉత్తర్వులు అమలుతో ఉద్యోగాల్లో స్థానికులకు 95శాతం అవకాశాలు దక్కుతాయని సీఎస్‌ తెలిపారు.