TS News: చెన్నూరు బస్టాండ్‌లో కలకలం.. డ్యూటీలో ఉన్న కండక్టర్‌కు కరోనా

చెన్నూరు: తెలంగాణలో కరోనా వైరస్‌ చాపకింద నీరులా వ్యాపిస్తోంది. ఎలాంటి లక్షణాలు లేకుండానే కరోనా కేసులు వెలుగు చూస్తున్నాయి. తాజాగా చెన్నూరు బస్టాండ్‌లో  చేసిన పరీక్షలో డ్యూటీలో ఉన్న మహిళా కండక్టర్‌కు కొవిడ్‌ పాజిటివ్‌గా నిర్ధారణ కావడం కలకలం రేపింది. వివరాల్లోకి వెళితే... హనుమకొండ డిపోకు చెందిన బస్సు ఈరోజు ఉదయం 11గంటలకు చెన్నూరుకు వచ్చింది. ప్రయాణికులంతా బస్సు దిగి వెళ్లిపోయారు. వైద్యారోగ్యశాఖ ఆధ్వర్యంలో చెన్నూరు బస్టాండ్‌లో కొవిడ్‌ పరీక్ష కేంద్రం ఏర్పాటు చేశారు. ఆసమయంలో ఒంట్లో నలతగా ఉండటంతో తనకు కొవిడ్‌ పరీక్ష చేయమని మహిళా కండక్టర్‌ కోరారు. ఇందులో ఆమెకు కొవిడ్‌ పాజిటివ్‌గా నిర్థారణ అయింది. వెంటనే బస్సును హనుమకొండ డిపోకు ఖాళీగా పంపించారు. అప్పటికే ప్రయాణికులు ఎక్కడివారు అక్కడికి వెళ్లిపోయారు.