గుజరాత్‌ తీరాన్ని తాకిన తౌక్టే

అహ్మదాబాద్‌: పశ్చిమ తీరాన్ని ఉక్కిరి బిక్కిరి చేస్తున్న ‘తౌక్టే’ తుపాను గుజరాత్‌ తీరాన్ని తాకింది. మరికొన్ని గంటల్లో పోరుబందర్‌-మహువాల మధ్య తీరాన్ని దాటనుంది. దీంతో గుజరాత్‌ తీర ప్రాంతాల్లో ఈదురుగాలులతో కూడిన భారీ వర్షాలు కురుస్తున్నాయి. గుజరాత్‌లోని నాలుగు జిల్లాల్లో తుపాన్‌ తీవ్ర ప్రభావాన్ని చూపుతోంది. దాదాపు మరో 2 గంటల పాటు తీరంలో తుపాన్‌ ప్రభావం తీవ్రంగా ఉండనుంది. తుపాన్‌ కారణంగా 185 కి.మీ. వేగంతో ఈదురుగాలులు వీస్తున్నాయి. వెరవల్‌-సోమనాథ్‌ తీరంలో అలలు ఎగిసిపడుతున్నాయి. ఇప్పటికే గుజరాత్‌ ప్రభుత్వం లోతట్టు ప్రాంతాల్లోని లక్షన్నర మందిని ముందు జాగ్రత్తగా సురక్షిత ప్రాంతాలకు తరలిచింది. సహాయ చర్యల్లో 44 ఎన్డీఆర్‌ఎఫ్‌, ఎస్డీఆర్‌ఎఫ్‌ బృందాలు పాల్గొన్నాయి. మరోవైపు మహారాష్ట్రలో తౌక్టే తుపాన్‌ బీభత్సం సృష్టించింది. మహారాష్ట్ర తీర ప్రాంతాల్లో భారీ వర్షాలు కురుస్తున్నాయి.