గీత దాటారు.. రూ.702 కోట్లు కట్టారు!

న్యూదిల్లీ: దిల్లీ అంటే దేశానికే రాజధాని.. చదువుకున్న వాళ్లూ ఎక్కువే. ట్రాఫిక్‌ నిబంధనలపై కూడా అవగాహన ఉంటుంది. అయినా ఏం లాభం? జనం ఎడాపెడా ‘గీత’ దాటేస్తూనే ఉన్నారు. ట్రాఫిక్‌ నిబంధనలను ఏమాత్రం పట్టించుకోవడం లేదు. రూల్స్‌ హద్దు మీరి ఆ నగర వాసులు ఒకటి కాదు.. రెండు కాదు.. ఈ పదేళ్లలో ఏకంగా రూ.702 కోట్లు జరిమానాగా చెల్లించారట. గతేడాదితో పోలిస్తే ఇది దాదాపు రెట్టింపు. సమాచార హక్కు చట్టం ద్వారా ఓ సంస్థ అడిగితే ట్రాఫిక్‌ పోలీసులు వివరాలు వెల్లడించారు. జరిమానా రూపంలో వచ్చిన ఈ ఆదాయంతో దిల్లీ పోలీసు విభాగం సమస్త నిర్వహణకు అయ్యే ఖర్చులో 20శాతం అవసరాలు తీరాయట. ఈ మొత్తం డబ్బుని దిల్లీ ట్రాన్స్‌పోర్ట్‌ కమిషనర్‌ ఖాతాలో ఎప్పటికప్పుడు జమ చేస్తుంటారు.