విశాఖలో తొలి డెల్టా వేరియంట్‌ కేసు

విశాఖపట్నం: విశాఖ శివారులోని వాంబే కాలనీలో కరోనా డెల్టా వేరియంట్‌ కేసు నమోదైనట్టు అధికారులు ధ్రువీకరించారు. వాంబే కాలనీకి చెందిన 51 ఏళ్ల మహిళలో డెల్టా రకం వైరస్‌ గుర్తించినట్టు డీఎంహెచ్‌వో సత్యనారాయణ వెల్లడించారు. గతేడాది కరోనా బారిన పడిన సదరు మహిళ హోం ఐసోలేషన్‌లో ఉండి కోలుకున్నారు. 

ఇటీవల కరోనా అనుమానంతో మధురవాడ ప్రాథమిక ఆరోగ్యకేంద్రానికి వెళ్లగా.. వైద్యులు పాజిటివ్‌గా తేల్చారు. ఆమె నమూనాలను హైదరాబాద్ పంపారు. ఆమెకు డెల్టా రకం వైరస్‌ సోకిందని నివేదిక వచ్చిందని గుర్తించారు. అప్రమత్తమైన జీవీఎంసీ అధికారులు బాధితురాలి నివాస పరిసరాల్లో ప్రత్యేక చర్యలు చేపట్టారు. ఆమె కుటుంబ సభ్యులంతా ఆరోగ్యంగానే ఉన్నారని అధికారులు తెలిపారు.