Pawan Kalyan: జూ పార్క్‌ల అభివృద్ధికి టీ విత్‌ డిప్యూటీ సీఎం కార్యక్రమం: పవన్‌ కల్యాణ్‌

రాష్ట్రంలోని జూలను అభివృద్ధి చేసేందుకు కార్పొరేట్‌లను ఆకర్షించేలా టీ విత్‌ డిప్యూటీ సీఎం కార్యక్రమాన్ని చేపట్టాలని ఉప ముఖ్యమంత్రి పవన్‌ కల్యాణ్ ఆదేశించారు.

Published : 10 Jul 2024 22:21 IST

విజయవాడ: రాష్ట్రంలోని జూలను అభివృద్ధి చేసేందుకు కార్పొరేట్‌లను ఆకర్షించేలా ‘టీ విత్‌ డిప్యూటీ సీఎం’ కార్యక్రమాన్ని చేపట్టాలని ఉప ముఖ్యమంత్రి పవన్‌ కల్యాణ్ ఆదేశించారు. విశాఖపట్నం, తిరుపతిలో ఉన్న జూ పార్క్‌లకు ఎక్కువ మంది పర్యాటకులను ఆకర్షించేలా కార్యాచరణ రూపొందించాలన్నారు. రాష్ట్రంలో నూతన జంతు ప్రదర్శన శాలల ఏర్పాటుకు ఉన్న అవకాశాలను పరిశీలించాలని చెప్పారు. జూ పార్క్‌ అథారిటీ ఆఫ్‌ ఆంధ్రప్రదేశ్‌ ఛైర్మన్‌ హోదాలో రాష్ట్రంలో జూ పార్క్‌లు, పర్యావరణహిత పర్యాటకరంగ అభివృద్ధి తదితర అంశాలపై అధికారులతో డిప్యూటీ సీఎం చర్చించారు. అంతర్జాతీయ స్థాయి ప్రమాణాలతో జూ పార్క్‌లను అభివృద్ధి చేయాలని, పర్యావరణహిత కార్యక్రమాలతో పర్యాటకులను ఆకట్టుకునేలా తీర్చిదిద్దాలని సూచించారు.

జూ పార్కుల అభివృద్ధికి పబ్లిక్ ప్రైవేటు భాగస్వామ్య (పీపీపీ) విధానంలో నిధులు సమకూర్చడం, అరుదైన.. ఆకర్షణీయంగా ఉండే జంతువులను దిగుమతి చేసుకోవడం వంటి అంశాల మీద దృష్టి సారించాలని అధికారులకు పవన్‌ సూచించారు. పర్యాటకులను ఆకర్షించే విధంగా వన్యప్రాణుల సందర్శనతో చక్కటి అనుభూతి కలిగేలా ఏర్పాట్లు చేయాలన్నారు. జూ పార్కుల అభివృద్ధిలో కార్పొరేట్‌ సంస్థల్ని భాగస్వాముల్ని చేయాలని, సీఎస్‌ఆర్‌ నిధులతో జూ పార్కులకు అవసరమైన అభివృద్ధి కార్యక్రమాలు చేపట్టాలన్నారు. పారిశ్రామికవేత్తలు వ్యక్తిగతంగా జంతువులను దత్తత తీసుకోవడం, అభివృద్ధికి దాతల సహకారం తీసుకోవడం వంటి కార్యచరణలు రూపొందించాలని సూచించారు. ఈ కార్యక్రమాన్ని ప్రమోట్ చేసేందుకు తిరుపతి, విశాఖ పర్యటనల్లో ప్రత్యేక సమావేశాలు ఏర్పాటు చేయాలని తెలిపారు. అవసరమైతే పారిశ్రామికవేత్తలు, కార్పొరేట్ సంస్థల ప్రతినిధులను జంతు ప్రదర్శనశాలల అభివృద్ధిలో పాలుపంచుకొనేలా చేసేందుకు ఉపముఖ్యమంత్రితో తేనీటి సేవనం (టీ విత్ డిప్యూటీ సీఎం) అనే కార్యక్రమాన్ని రూపొందించాలని చెప్పారు.

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని