Health: తీపి జబ్బు..ముకుతాడు వేయకపోతే ముప్పు

ఇంటర్నెట్‌డెస్క్‌: జీవిత కాల జబ్బు మధుమేహాన్ని అదుపులో ఉంచుకోవడం తప్ప శాశ్వతంగా తగ్గించుకునే చికిత్స లేదు. రక్తంలో గ్లూకోజ్‌ శాతం అదుపు తప్పడంతోనే ఈ ప్రమాదం వస్తుంది.  కళ్ల నుంచి కాళ్ల దాకా ప్రతి అవయవాన్ని దెబ్బతీసే ప్రమాదకారి ఇది. ఆహారం, అలవాట్లు, జీవనశైలిలో జాగ్రత్తగా ఉండాలి. మధుమేహం తీరుతెన్నులు, తీసుకోవాల్సిన  జాగ్రత్తలను ఎండోక్రైనాలజిస్టు శ్రీనివాస్‌ కందుల వివరించారు.

అవగాహన కీలకం: మధుమేహం ఉన్న వారిలో చక్కెర శాతం ఎక్కువగా ఉంటుంది. మధుమేహం టైప్‌-1, టైప్‌-2 రకాలు. ఎక్కువ మందికి టైప్‌-2 మధుమేహం వస్తుంది. టైప్‌-1 వంశపారంపర్యంగా వస్తుంది. టైప్‌-2 వారి జీవనశైలిలో మార్పులు, వ్యాయామం లేకపోవడం, బరువు అధికంగా ఉండటంతో జబ్బు వస్తుంది. వీరికి ముందుగా మందులతో నియంత్రించినా క్రమేపి ఇన్సులిన్‌ ఇవ్వాల్సి వస్తుంది.

లక్షణాలు ఇవీ: ఎక్కువ షుగర్‌ ఉండటంతో తరచుగా మూత్రానికి వెళ్లాల్సి రావడం, ఎక్కువ దాహం వేయడం, అత్యధికంగా బరువు తగ్గిపోవడం, అరికాళ్లలో మంట ఉండటం, చూపు మందగించడం లాంటి సమస్యలు కనిపిస్తాయి. 

ప్రమాదకరం ఎందుకంటే: మధుమేహం ఎక్కువ కాలం నియంత్రణలో లేకపోవడంతో దాని ప్రభావం అనేక అవయవాలపై పడుతుంది. రెటినోపతిలో చూపు మందగిస్తుంది. నెప్రోపతిలో కిడ్నీలు దెబ్బతింటాయి. న్యూరోపతిలో నరాలు దెబ్బతినడంతో నడవడం కష్టంగా ఉంటుంది. గుండెపోటు, బ్రెయిన్‌స్ట్రోక్‌ వచ్చే ప్రమాదం రావచ్చు. 

పరీక్షలు ఇవీ: పాస్టింగ్‌, పోస్ట్‌లంచ్‌ గ్గూకోజ్‌ పరీక్ష, హెచ్‌బీఏవన్‌సీ, క్రియాటిన్‌, ప్రోటీన్‌, కంటి పరీక్షలు ఏడాదికోసారైనా చేసుకోవాలి. నీరసం, గుండెలో నొప్పిగా ఉంటే ఈసీజీ, ఎకో పరీక్షలు చేయించాలి.

అదుపులో ఇలా:  మంచి ఆహార శైలి, రోజూ వ్యాయామం చేయడం అవసరం. మందులు తప్పనిసరిగా వేసుకోవాలి. చక్కెర శాతాన్ని తరచుగా పరీక్షించుకోవాలి.