Kuppam: పట్టాలు తప్పిన డబుల్‌ డెక్కర్‌ రైలు.. రాకపోకలకు అంతరాయం

కుప్పం పట్టణం: చిత్తూరు జిల్లాలో పెను ప్రమాదం తప్పింది. చిత్తూరు జిల్లా గుడిపల్లి మండలం బిసానత్తం రైల్వేస్టేషన్‌ సమీపంలో డబుల్‌డెక్కర్‌ రైలు పట్టాలు తప్పింది. చెన్నై నుంచి బెంగళూరుకు బయలుదేరిన ఈ రైలు.. కర్ణాటక సరిహద్దులోని బిసానత్తం వద్ద పట్టాలు తప్పడంతో వెంటనే లోకో పైలట్‌ అప్రమత్తమయ్యారు. పరిస్థితిని గమనించి రైలును  నిలిపేయడంతో ఎలాంటి ప్రమాదం చోటు చేసుకోలేదు.

ప్రస్తుతం ఈ రైలును క్రమబద్ధీకరించేందుకు రైల్వే అధికారులు చర్యలు చేపట్టారు. డబుల్‌ డెక్కర్‌ రైలు పట్టాలు తప్పడంతో చెన్నై-బెంగళూరు మార్గంలో పలు రైళ్ల రాకపోకలు నిలిచిపోయాయి. బృందావన్‌ ఎక్స్‌ప్రెస్‌ను కుప్పం స్టేషన్‌ సమీపంలో.. బెంగళూరు కంటోన్మెంట్‌ స్పెషల్‌ రైలును తమిళనాడులోని జోలారుపేట జంక్షన్‌లో నిలపేశారు. రైళ్లు నిలిచిపోవడంతో ప్రయాణికులు ఇబ్బందిపడ్డారు.