RRR: ‘ఆర్‌ఆర్‌ఆర్‌’ టికెట్లు ఉచితం.. గుంటూరులో గ్యాస్‌ ఏజెన్సీ బంపర్ ఆఫర్‌

గుంటూరు: పాన్‌ ఇండియా చిత్రం ‘RRR’కు ఇప్పుడున్న క్రేజ్‌ అంతా ఇంతా కాదు. అందుకే ఆ క్రేజ్‌ను ఓ గ్యాస్‌ ఏజెన్సీ కూడా తమ సేవల వృద్ధి కోసం వాడుకుంటోంది. సింగిల్‌ సిలిండర్‌ ఉన్న వినియోగదారులు రెండో సిలిండర్‌ తీసుకుంటే ఆర్ఆర్‌ఆర్‌ సినిమా టికెట్లు ఉచితంగా ఇస్తామంటోంది. గుంటూరు జిల్లా దుగ్గిరాలలోని హెచ్‌పీ గ్యాస్‌ ఏజెన్సీ ఈ బంపర్‌ ఆఫర్‌ను ప్రకటించింది. అంతటితో ఆగకుండా తమ ఏజెన్సీ ఆఫీసు ముందు ఫ్లెక్సీ ఏర్పాటు చేసింది. గతంలో బాహుబలి-2 టికెట్లు కూడా ఇలా ఉచితంగా అందించింది. సినిమా విడుదల రోజే ఇంటికెళ్లి మరీ టికెట్లు ఇస్తామని ఏజెన్సీ నిర్వాహకులు చెబుతున్నారు. ఈ విషయం తెలుసుకున్న వినియోగదారులు ఇప్పటికే ఏజెన్సీని సంప్రదించినట్లు నిర్వాహకులు తెలిపారు.