TSRTC ఆన్‌లైన్‌ టికెట్‌ బుకింగ్‌లో ‘డైనమిక్‌ ప్రైసింగ్‌’!

హైదరాబాద్‌:  తెలంగాణ రోడ్డు రవాణా సంస్థ (TSRTC) కీలక నిర్ణయం తీసుకుంది. ఆన్‌లైన్‌ టికెట్‌ బుకింగ్‌లో ‘డైనమిక్‌ ప్రైసింగ్‌’ను అమలు చేయాలని నిర్ణయించింది. పైలట్‌ ప్రాజెక్టులో భాగంగా బెంగళూరు మార్గంలో నడిచే 46 సర్వీసుల్లో ఈ నెల 27 నుంచి అమలు చేయనుంది. ఈ మేరకు టీఎస్‌ఆర్టీసీ ఛైర్మన్‌ బాజిరెడ్డి గోవర్దన్‌ రెడ్డితో కలిసి ఎండీ సజ్జనార్‌ సంబంధిత వివరాలను మీడియాకు వెల్లడించారు. విమానాలు, హోటళ్లు, ప్రైవేట్‌ బస్‌ ఆపరేటర్లు ఇప్పటికే ఈ విధానం అమలు చేస్తున్నాయని తెలిపారు. త్వరలోనే ఆన్‌లైన్‌ టికెట్‌ బుకింగ్‌ సదుపాయమున్న సర్వీసులన్నింటిలోనూ ఈ విధానాన్ని అందుబాటులోకి తెచ్చేందుకు  కసరత్తు చేస్తున్నట్లు చెప్పారు. ఈ విధానంలో డిమాండ్‌ను బట్టి టికెట్‌ ధరలో మార్పు ఉంటుంది.