Kishan Reddy: హైదరాబాద్‌, విశాఖలో మ్యూజియంల ఏర్పాటు: కిషన్‌రెడ్డి

హైదరాబాద్‌: నగరంలోని పార్క్‌ హయత్‌ హోటల్‌లో రిమేజినింగ్‌ మ్యూజియమ్స్‌ ఇన్‌ ఇండియా సమ్మిట్‌ను కేంద్ర సాంస్కృతిక, పర్యాటకశాఖ మంత్రి కిషన్‌రెడ్డి ప్రారంభించారు. ఈ సందర్భంగా ఆయన మాట్లాడుతూ...‘‘మానవ నాగరికత ప్రారంభమైనప్పటి నుంచి భారతదేశం గొప్ప సాంస్కృతిక వారసత్వం కలిగిన భూమి. ఆజాదీకా అమృత్‌ మహోత్సవ్‌ను జరుపుకొంటున్న తరుణంలో.. మన సాంస్కృతిక వారసత్వాన్ని సంరక్షించడం, శాశ్వతంగా కొనసాగించడంపై కేంద్ర ప్రభుత్వం దృష్టి సారించింది. భారత దేశంలోని వెయ్యికి పైగా మ్యూజియంలు సాంస్కృతిక వారసత్వాన్ని ప్రదర్శించడంలో భవిష్యత్‌ తరాలకు అవగాహన కల్పించడంలో కీలక పాత్ర పోషిస్తాయి. గత ఏడేళ్లుగా కొత్త మ్యూజియంల నిర్మాణంపై దృష్టి సారించాం. ఇప్పటికే ఉన్న మ్యూజియంలను కొత్త తరానికి అనువుగా ఉండేలా అభివృద్ధి చేయడానికి కేంద్ర ప్రభుత్వం పెద్ద మొత్తంలో ఖర్చు చేస్తోంది. దేశ వ్యాప్తంగా  స్వాతంత్ర్య సమరయోధుల పేరుతో 10 నూతన మ్యూజియంలను కేంద్రం ఏర్పాటు చేస్తోంది.  తెలుగు రాష్ట్రాల్లో హైదరాబాద్‌, విశాఖపట్నంలో మ్యూజియంలను ఏర్పాటు చేస్తున్నాం’’ అని కిషన్‌రెడ్డి తెలిపారు.

‘‘ఏపీలో 6, తెలంగాణలో 5 కొత్త  మ్యూజియంలకు గ్రాంట్‌ ఇస్తాం. ఇప్పటికే రూ.కోటి రాష్ట్ర ప్రభుత్వానికి మంజూరు చేశాం. ఏపీలో రూ.35 కోట్లతో అల్లూరి సీతారామరాజు మ్యూజియం నిర్మాణం జరుగుతోంది. అల్లూరి జయంతి రోజున ప్రారంభిస్తాం. హైదరాబాద్‌కు కేంద్రం సైన్స్‌ సిటీని మంజూరు చేసింది. సైన్స్‌ సిటీకి 25 ఎకరాల స్థలం కేటాయించాలని సీఎంకు లేఖ రాశాం. రాష్ట్ర ప్రభుత్వం నిజాం నగలను భద్ర పరిచేందుకు భవనం కేటాయిస్తే తీసుకురావడానికి మాకు అభ్యంతరం లేదు’’ అని కిషన్‌రెడ్డి వెల్లడించారు.