Andhrapradesh: అయ్యో.. గర్భిణికి వైద్యం నిరాకరించిన వైద్యులు..!

అనంతపురం: అనంతపురం ప్రభుత్వ ఆస్పత్రిలో చికిత్స కోసం వచ్చిన గర్భిణి పట్ల వైద్య సిబ్బంది నిర్లక్ష్యంగా వ్యవహరించారని బాధితురాలి బందువులు ఆరోపిస్తున్నారు. సత్యసాయి జిల్లా కదిరి పరిధిలోని మరువతండాకు చెందిన శ్రీవాణి భర్తతో కలిసి బుదవారం సాయంత్రం మోటారు సైకిల్‌పై వెళ్తుండగా ఎదురుగా వచ్చిన కారు ఢీకొట్టింది. ఈ ఘటనలో గర్భిణి అయిన శ్రీవాణి గాయపడింది. చికిత్స కోసం కదిరి ఆస్పత్రికి తరలించగా అక్కడి వైద్యులు అనంతపురం తీసుకెళ్లాలని సూచించారు. అర్ధరాత్రి ఒంటి గంట సమయానికి అనంతపురం ప్రభుత్వ ఆస్పత్రికి చేరుకున్న శ్రీవాణికి చికిత్స అందించేందుకు అక్కడి వైద్య సిబ్బంది నిరాకరించారని శ్రీవాణి బంధువులు ఆరోపిస్తున్నారు. గర్భిణి అని కూడా చూడకుండా ఆస్పత్రి నుంచి బయటకు వెళ్లిపొమ్మన్నారని ఆవేదన వ్యక్తం చేస్తున్నారు.