Chandrababu: రాజమహేంద్రవరం బయల్దేరిన అమరావతి రైతులు.. మార్గంమధ్యలో అడ్డుకున్న పోలీసులు

అమరావతి: తెదేపా అధినేత చంద్రబాబు సతీమణి నారా భువనేశ్వరి, కోడలు బ్రాహ్మణిని కలిసేందుకు రాజధాని అమరావతి ప్రాంత రైతులు రాజమహేంద్రవరం బయల్దేరి వెళ్లారు. అయితే మార్గంమధ్యలో పోలీసులు వారిని అడ్డుకున్నారు. మంగళవారం ఉదయం రాజధాని ప్రాంతంలోని తుళ్లూరు, వెలగపూడికి చెందిన రైతులు ప్రత్యేక బస్సులు, సొంత వాహనాల్లో పయనమయ్యారు. అమరావతి రూపశిల్పి చంద్రబాబును వైకాపా ప్రభుత్వం అక్రమంగా జైల్లో పెట్టిందని.. ఇలాంటి సమయంలో తామంతా ఆయన కుటుంబానికి అండగా ఉంటామని రైతులు చెప్పారు.

రాజమహేంద్రవరం వెళ్లేందుకు అనుమతి లేదంటూ వీరవల్లి, నల్లజర్ల టోల్‌గేట్ల వద్ద రైతుల బస్సులను పోలీసులు నిలిపేశారు. బస్సు డ్రైవర్‌లను బలవంతంగా దించేశారు. ఈక్రమంలో పోలీసులు, రైతుల మధ్య తీవ్ర వాగ్వాదం చోటుచేసుకుంది. రాజమహేంద్రవరం వెళ్లేందుకు అనుమతి ఎందుకని ప్రశ్నించారు. తామేమీ పాకిస్థాన్‌ నుంచి రాలేదని మహిళలు ఆక్రోశించారు. తాము ఎట్టిపరిస్థితిలోనూ రాజమహేంద్రవరం వెళ్లి తీరతామని రైతులు తేల్చిచెబుతున్నారు.