Kamareddy: దిష్టిబొమ్మకు వినతిపత్రం.. రేపు కామారెడ్డి బంద్‌కు పిలుపునిచ్చిన రైతులు

కామారెడ్డి: కామారెడ్డి కలెక్టరేట్‌ వద్ద 8 గంటలుగా  కొనసాగించిన ఆందోళనను రైతులు తాత్కాలికంగా విరమించారు. ఇవాళ ఉదయం నుంచి ధర్నా చేసిన రైతులు కలెక్టరేట్‌ వద్ద దిష్టిబొమ్మకు వినతిపత్రం ఇచ్చి గేటుకు వేలాడదీశారు. శుక్రవారం కామారెడ్డి  పట్టణ బంద్‌కు పిలుపునిచ్చారు. రేపటి నుంచి భవిష్యత్‌ కార్యాచరణ మొదలవుతుందని రైతు జేఏసీ నేతలు తెలిపారు. కలెక్టర్‌ వచ్చి వినతిపత్రం తీసుకోవాలని వేలాది మంది రైతులు కోరినా .. ఆయన బయటకు రాలేదని రైతు సంఘం నేతలు ఆగ్రహం వ్యక్తం చేశారు. ప్రభుత్వం స్పందించే వరకు ఆందోళన కొనసాగుతుందని హెచ్చరించారు.

రైతులతో మాట్లాడేందుకు సిద్ధమే: కలెక్టర్‌

రైతులతో మాట్లాడేందుకు సిద్ధమేనని  కామారెడ్డి కలెక్టర్‌ జితేశ్‌ పాటిల్‌ తెలిపారు. రైతు ప్రతినిధులు వచ్చి సమస్యలు చెప్పుకోవచ్చన్నారు. రైతులు లేవనెత్తిన అంశాలను పరిగణనలోకి తీసుకుంటామన్నారు. రైతుల తరఫున 10మంది వచ్చి వినతిపత్రం ఇవ్వవచ్చన్నారు. రైతుల అభ్యంతరాలను లిఖితపూర్వకంగా ఇవ్వాలని సూచించారు. ఇండస్ట్రియల్‌ మాస్టర్‌ ప్లాన్‌ ఇంకా ముసాయిదా  దశలోనే ఉందన్న కలెక్టర్‌... మాస్టర్‌ ప్లాన్‌పై రైతుల్లో కొందరు భయం సృష్టించారన్నారు.