Telangana News: పౌరసరఫరాల శాఖ గోదాంలో భారీ అగ్ని ప్రమాదం

సిరిసిల్ల రూరల్‌: రాజన్న సిరిసిల్ల జిల్లా తంగళ్లపల్లి మండలంలోని టెక్స్‌టైల్‌ పార్క్ సమీపంలోని పౌరసరఫరాల శాఖ గోదాంలో భారీ అగ్ని ప్రమాదం సంభవించింది. సమాచారం అందుకున్న అగ్నిమాపక సిబ్బంది రెండు ఫైర్‌ ఇంజిన్ల సాయంతో మంటలను అదుపు చేశారు. అగ్నిప్రమాదం సంభవించిన గోదాంలో సుమారు 13 లక్షల గోనె సంచులను నిల్వ ఉంచారు. ప్రమాదవశాత్తు గోదాంలోని గోనెసంచులకు నిప్పంటుకొని గోదాంలో నిలువ ఉంచిన మొత్తం సంచులు పూర్తిగా దగ్ధమయ్యాయి. పెద్ద ఎత్తున మంటలు ఎగిసిపడుతుండడంతో భారీగా నష్టం జరిగే అవకాశం ఉందని అధికారులు చెబుతున్నారు. సిరిసిల్ల తహసీల్దార్‌ విజయ్, అసిస్టెంట్ డిస్ట్రిక్ట్ ఫైర్ ఆఫీసర్ ప్రభాకర్ రెడ్డి, రూరల్ సీఐ ఉపేందర్, ఎస్సై లక్ష్మారెడ్డి, స్టేషన్ ఫైర్ ఆఫీసర్ సతీష్ రావు ఘటనా స్థలానికి చేరుకొని క్షేత్రస్థాయిలో పరిస్థితిని పరిశీలించారు.