Food: ఆహారం జీర్ణం అవ్వట్లేదా! కారణాలు ఇవే కావచ్చు!

ఇంటర్నెట్‌ డెస్క్‌: తిన్న ఆహారం జీర్ణం కాక చాలామంది ఇబ్బంది పడుతుంటారు. మధ్యాహ్నం తిన్న భోజనం ఇంకా జీర్ణం కాలేదని.. రాత్రి సమయంలో తినకుండా పడుకునేవాళ్లు చాలామంది ఉన్నారు. మరి ఈ సమస్యకు పరిష్కారం ఎలా! అసలు ఈ సమస్య ఎందుకు వస్తుంది? కారణాలేంటి! తెలుసుకోండి.

* ప్రస్తుతం మారుతున్న కాలంతో పాటు జీవనశైలిలో కూడా అనేక మార్పులు వచ్చాయి. దీంతో లాభాలతో పాటు నష్టాలూ వెంట వచ్చేశాయి.

* మధ్యాహ్నం భోజనం 12 గంటల నుంచి 2 గంటల లోపే తినేయాలి. ఆలస్యంగా తింటే ఆహారం జీర్ణమవదు. కొంతమంది పనిలో పడి, లేదా బరువు పెరుగుతామనే భయంతో భోజనం చేయటం మానేస్తుంటారు. దీని వల్ల జీర్ణ వ్యవస్థ బాగా దెబ్బతింటుంది.

* రాత్రి భోజనం 8 గంటల కల్లా తినేయాలి. తర్వాత కాసేపు నడవాలి. తిన్న వెంటనే నిద్రపోవటం మంచిది కాదు.

* ఉదయం అల్పాహారమైనా, భోజనమైనా సమయానికి తినేయాలి. నిర్ణీత సమయానికి తినడం వల్ల చాలావరకూ సమస్యలను నివారించవచ్చు.

* చాలామంది అర్ధరాత్రి దాటేవరకు సెల్‌ఫోన్లు, లాప్‌టాప్‌లు వాడుతూ ఉంటారు. దీని వల్ల తిన్న ఆహారం సరిగా జీర్ణం అవ్వదు. ఆరోగ్య సమస్యలు అధికమవుతాయి. 
* జీర్ణ వ్యవస్థ సరిగ్గా పని చేయాలంటే ఉదయం గోరు వెచ్చిన నీటిని తాగాలి. ఇందులో తేనె, నిమ్మరసం చేర్చుకుంటే మరిన్ని ప్రయోజనాలుంటాయి. 

* చాలామంది ఎక్కువగా టీ, కాఫీలు తాగుతుంటారు. ఎక్కువ మోతాదులో తీసుకుంటే ఆహారం తొందరగా జీర్ణమవదు.

* జంక్‌ ఫుడ్‌ను తగ్గించండి. ఇంట్లో వండిన ఆహారాన్నే తినండి.