Andhra News: కలుషిత ఆహారం తిని 150మంది విద్యార్థినులకు అస్వస్థత

సత్తెన్నపల్లి గ్రామీణం: పల్నాడు జిల్లా సత్తెనపల్లి మండలం రామకృష్ణాపురం డా.బీఆర్‌ అంబేడ్కర్‌ బాలికల గురుకుల విద్యాలయంలో సుమారు 150మంది విద్యార్థినులు అస్వస్థతకు గురయ్యారు. ఉదయం కలుషిత అల్పాహారం తీసుకోవడం వల్ల సుమారు 30మంది వాంతులు, విరేచనాలతో ఇబ్బందిపడ్డారు. తర్వాత మధ్యాహ్న భోజనం అనంతరం మరికొందరు వాంతులతో అస్వస్థతకు గురవడంతో పాఠశాల ప్రిన్సిపల్‌, ఉపాధ్యాయులు అప్రమత్తమయ్యారు. స్వల్ప జ్వరం, నీరసంతో మరికొందరు బాధపడటంతో మొత్తం 150 మందిని సత్తెనపల్లి పట్టణంలోని ప్రభుత్వ ఆసుపత్రికి తరలించారు. వారందరికీ ఆసుపత్రిలో వైద్యులు చికిత్స అందిస్తున్నారు. జాయింట్‌ కలెక్టర్‌ శ్యామ్‌ప్రసాద్‌ ఆర్డీవో రాజకుమారి, డీఎస్పీ ఆదినారాయణ ఆసుపత్రిలోని బాలికలను పరామర్శించారు. విద్యార్థినుల ఆరోగ్యం నిలకడగా ఉందని వైద్యులు తెలిపారు. విద్యాలయంలో మొత్తం 640మంది విద్యార్థినులు చదువుతున్నారు.