Andhra News: కవిటి మండలంలో విషాదం.. 40 కోతులు మృతి, అపస్మారక స్థితిలో మరికొన్ని

కవిటి: శ్రీకాకుళం జిల్లా కవిటి మండలంలో విషాద ఘటన చోటు చేసుకుంది. శిలాగం గ్రామ సమీపంలోని రహదారిపై 40 కోతుల మృతదేహాలు పడిఉండటం కలకలం రేపింది. రోడ్డు పక్కన తోటలో అపస్మారక స్థితిలో మరికొన్ని కోతులు పడి ఉన్నాయి. అపస్మారక స్థితిలో ఉన్న కోతులకు స్థానికులు బిస్కెట్లు, రొట్టెలు, నీళ్లు అందించారు. కోతులపై విషప్రయోగం జరిగిందా? లేక విద్యుదాఘాతంతో మృతి చెందాయా? అని స్థానికులు అనుమానిస్తున్నారు. కోతుల మృతదేహాలను పరీక్షించేందుకు అటవీశాఖ అధికారులు ఘటనాస్థలికి బయలుదేరారు. పూర్తి స్థాయిలో పరిశీలించిన తర్వాతే కోతుల మృతికి కారణాలు తెలుపుతామని అటవీశాఖ అధికారులు వెల్లడించారు.