Palnadu: పోస్టుమార్టానికీ లంచం !.. ఆస్పత్రి ఎదుట బంధువుల ఆందోళన

గురజాల: పోస్టుమార్టం నిర్వహించేందుకు రూ.5 వేలు డిమాండ్‌ చేశారని ఆరోపిస్తూ పల్నాడు జిల్లా గురజాల సామాజిక ఆరోగ్య కేంద్రం వద్ద మృతుడి బంధువులు ఆందోళనకు దిగారు. వైద్యులు, సిబ్బంది తీరును నిరసిస్తూ ఆస్పత్రి ఎదుట బైఠాయించారు. బంధువుల ఆందోళనతో దిగి వచ్చిన వైద్యులు పోస్టుమార్టం నిర్వహించారు. వివరాల్లోకి వెళ్తే..  పల్నాడు జిల్లా గురజాల పట్టణానికి చెందిన రాజవరపు ఈశ్వర్‌ (25) అనే యువకుడు దాచేపల్లి మండలంలోని రైల్వే బ్రిడ్జి దగ్గర గురువారం రాత్రి 11 గంటల సమయంలో రోడ్డు ప్రమాదంలో మరణించాడు. దీంతో పోస్టుమార్టం నిమిత్తం బంధువులు మృతదేహాన్ని గురజాల సామాజిక ఆరోగ్య కేంద్రానికి తరలించారు. అయితే, పోస్టుమార్టం నిర్వహించేందుకు వైద్యులు రూ.5 వేలు డిమాండ్‌ చేయడంతో అందుకు బంధువులు నిరాకరించారు. దీంతో మధ్యాహ్నం 3 గంటలైనా వైద్యులు మృతదేహాన్ని అప్పగించలేదు. డబ్బులు ఇస్తేనే పోస్టుమార్టం చేసి మృతదేహాన్ని అప్పగిస్తామని వైద్యులు, సిబ్బంది భీష్మించుకోవడంతో మృతుడి బంధువులు ఆందోళనకు దిగినట్లు తెలుస్తోంది.