పాపం.. ఈ పాము..

ఇంటర్నెట్‌ డెస్క్‌: భూమ్మీద ప్లాస్టిక్‌ వ్యర్థాల స్థాయి నానాటికీ పెరిగిపోతోంది. మనుషులతో పాటు, జంతుజాలం కూడా వీటి బారిన పడి ఎన్నో సమస్యలు ఎదుర్కొంటున్నాయి. జంతువులు ప్లాస్టిక్‌ వ్యర్థాల బారిన పడి ఎలా బాధపడుతున్నాయో చెప్పే ఓ వీడియో తాజాగా అంతర్జాలంలో వైరల్‌గా మారింది. ఆహారానికి, ప్లాస్టిక్‌కూ తేడా తెలియని ప్రాణులు ఎలా నరకం అనుభవిస్తున్నాయో దీనిలో మనం చూడవచ్చు. ఒక పాము ఏదో తిన్నట్టుగా దాని పొట్ట ఉబ్చి ఉంది. అక్కడే ఉన్న ఓ వ్యక్తి దాన్ని కర్రతో అదిలించగా ఆ పాము మింగిన దాన్ని తిరిగి కక్కేసింది. ఇంతకీ ఆ పాము నోటి నుంచి ఏం బయటకు వచ్చిందో తెలుసా? ఒక ప్లాస్టిక్‌ బాటిల్‌. నోరులేని జీవాలకు ప్లాస్టిక్‌ ప్రమాదకరంగా పరిణమించిందనటానికి బాధాకరమైన ఈ వీడియో ప్రత్యక్ష నిదర్శనం అని నెటిజన్లు ఆవేదన వ్యక్తం చేస్తున్నారు.