‘సీఏఏ’పై చర్చించేందుకు దిల్లీ రమ్మన్నారు 

కోల్‌కతా: కేంద్రం నుంచి రాష్ట్రానికి రావాల్సిన నిధులను వెంటనే విడుదల చేయాని, సీఏఏ, ఎన్‌ఆర్సీ విషయాల్లో పునరాలోచించుకోవాలని ప్రధాని నరేంద్రమోదీని కోరినట్లు పశ్చిమ బెంగాల్‌ ముఖ్యమంత్రి మమతా బెనర్జీ అన్నారు. కోల్‌కతా పోర్టు ట్రస్ట్‌ 150వ వార్షికోత్సవాల్లో మోదీ పాల్గొనేందుకు కోల్‌కతా చేరుకున్నారు. ఈ నేపథ్యంలో సీఎం మమతతో శనివారం సమావేశమయ్యారు. ఈ సమావేశంలో సీఏఏ, ఎన్‌ఆర్సీతో పాటు నిధుల ఈ విషయాలపై చర్చించినట్లు ఆమె తెలిపారు. కాగా నిధుల విడుదల విషయంలో ప్రధాని సానుకూలంగా స్పందించారని ఆమె పేర్కొన్నారు.
‘మీరు మా అతిథిగా వచ్చారు. ఈ విషయాలు మాట్లాడటానికి ఇది సరైన సమయమో కాదో తెలియదు. కానీ, మేము పౌరసత్వ సవరణ చట్టాన్ని వ్యతిరేకిస్తున్నాం. సీఏఏతో పాటు ఎన్‌ఆర్సీ, ఎన్‌పీఆర్‌లు భారత ప్రజల్లో విభజన ఆందోళన కలిగిస్తున్నాయి. ఈ విషయంలో మీరు పునరాలోచించాలని కోరుతున్నాం’ అని ప్రధానితో చెప్పినట్లు మమత తెలిపారు. అయితే, ఈ విషయాల్లో మరింత లోతుగా చర్చించేందును తనను దిల్లీ రావాల్సిందిగా ప్రధాని ఆహ్వానించారని ఆమె తెలిపారు.