పండగ వేళ బోసిపోయిన హైదరాబాద్‌ రోడ్లు

హైదరాబాద్‌: సంక్రాంతి పండుగకు నగరవాసులు గ్రామాల బాట పట్టడంతో నగరంలోని రోడ్లన్నీ నిర్మానుష్యంగా మారాయి. కిటకిటలాడే కూడళ్లు బోసిపోయాయి. కోటి జనాభా ఉన్న నగరంలో నిత్యం 50 లక్షల వాహనాలు తిరుగుతూ రహదారిపై రద్దీగా ఉంటాయి. కానీ పండుగ రోజున అతి కొద్ది వాహనాలు మాత్రమే రోడ్డెక్కాయి. ట్రాఫిక్‌ పోలీసులు లేనిదే వాహనాలు ముందుకు కదలని సంఘటనలు చాలా చూశాం. కానీ ప్రస్తుతం ఏ ఒక్క ట్రాఫిక్‌ పోలీసు  కూడళ్ల దగ్గర కనిపించడం లేదు. ట్యాంక్‌బండ్‌, అసెంబ్లీ, ఖైరతాబాద్‌, లిబర్టీ చౌరస్తా, బేగంపేట వంటి ప్రధాన రాహదారులపై వాహన రాకపోకలు అంతంత మాత్రంగానే ఉన్నాయి.