ఆ సాఫ్ట్‌వేర్‌ ఉద్యోగిని ఆచూకీ దొరికింది!

హైదరాబాద్‌: సాఫ్ట్‌వేర్‌ ఉద్యోగిని రోహిత అదృశ్యం కేసులో దర్యాప్తు ముమ్మరం చేసిన పోలీసులు ఆమె ఆచూకీ గుర్తించారు. మొత్తం ఐదు ప్రత్యేక బృందాలతో గాలించి చివరకు ఆమె పుణెలో ఉన్నట్టు గుర్తించారు. కుటుంబ కలహాలతోనే తాను ఇంట్లో నుంచి వెళ్లిపోయినట్టు ఆమె గచ్చిబౌలి పోలీసులకు తెలిపారు. 20 రోజుల కిందట గచ్చిబౌలిలో రోహిత కనిపించకుండా పోయిన ఘటన కలకలం రేపిన విషయం తెలిసిందే. ఆమె పుణెలో ఉన్నట్టు గుర్తించిన పోలీసులు.. హైదరాబాద్‌ తీసుకురానున్నారు.

గత నెల 26న ఇంట్లోనుంచి వెళ్లిన రోహిత బయటకు వెళ్లి తిరిగి రాకపోవడంతో 29న కుటుంబ సభ్యులు పోలీసులకు ఫిర్యాదు చేశారు. అదృశ్యానికి ముందు ఆమె తన బ్యాంకుఖాతా నుంచి రూ.80వేలు డ్రా చేసినట్టు పోలీసులు గుర్తించారు. ఇంటి నుంచివెళ్లే ముందు తన ఫోన్‌ కూడా ఆమెతీసుకెళ్లలేదని ఇటీవల పోలీసులు వెల్లడించారు. దీంతో ఆమె మొబైల్‌ ఫోన్‌ను అన్‌లాక్‌ చేసి కాల్‌ డేటాను సైతం పరిశీలించారు. రోహిత భర్తతో విడిపోయి వేరుగా ఉంటోందని కుటుంబ సభ్యులు తెలిపారు.