గవర్నర్‌కు తెదేపా శాసనసభాపక్షం లేఖ

అమరావతి: గవర్నర్‌ బిశ్వభూషణ్‌ హరిచందన్‌కు తెదేపా శాసన సభాపక్షం లేఖ రాసింది. రాజ్యాంగాన్ని పరిరక్షించేందుకు జోక్యం చేసుకోవాలని లేఖలో ఆయన్ను కోరింది. శాసనసభలో ప్రతిపక్ష సభ్యులపై దాడులు చేయండంటూ మంత్రులు, ఎమ్మెల్యేలను సీఎం ప్రోత్సహిస్తుంటే సభాపతి ప్రేక్షకపాత్ర పోషిస్తున్నారని పేర్కొంది. రాష్ట్ర ప్రజల మనోభావాలను పరిగణనలోకి తీసుకుని దానికి అనుగుణంగా జోక్యం చేసుకోవాలని విజ్ఞప్తి చేసింది. 
‘‘అసెంబ్లీని ప్రజాస్వామ్య పద్ధతిలో నిర్వహించేలా వెంటనే తక్షణ చర్యలు చేపట్టాలి. శాసన సభాపతి, అధికార పార్టీ సభ్యుల ప్రవర్తన సభలో సరిగాలేదు. అప్రజాస్వామిక విధానాలతో శాసనసభ నడుస్తోంది. సీఎంతో పాటు మంత్రులు నిబంధనలను పక్కనపెట్టి అధికార పార్టీకి అనుగుణంగా సభను నిర్వహిస్తున్నారు. సభాపతి సైతం మమ్మల్ని భయభ్రాంతులకు గురిచేసే విధంగా వ్యవహరిస్తున్నారు. ప్రతిపక్ష సభ్యులపై వివక్ష చూపుతూ సొంత పార్టీ సభ్యులకు అనుకూలంగా ఆయన వ్యవహారశైలి ఉంటోంది’’ అని గవర్నర్‌కు రాసిన లేఖలో తెదేపా ఎమ్మెల్యేలు పేర్కొన్నారు.