లోక్‌సభ స్పీకర్‌ను కలిసిన అమరావతి రైతులు

దిల్లీ: అమరావతి రైతులు లోక్‌సభ స్పీకర్‌ ఓంబిర్లాను కలిశారు. రైతులతో పాటు అమరావతి పరిరక్షణ సమితి నేతలు రాజధాని తరలింపు అంశాన్ని స్పీకర్‌ దృష్టికి తీసుకెళ్లారు. తమకు న్యాయం జరిగేలా చర్యలు తీసుకోవాలని కోరారు. అనంతరం భాజపా ఎంపీ సుజనా చౌదరితోనూ రైతులు, ఐకాస నేతలు భేటీ అయ్యారు. ఈ సందర్భంగా సుజనా మాట్లాడుతూ రాజధాని మార్పు విషయంలో ప్రతికూల కమిటీలే ఉన్నాయని.. సీఎం జగన్‌ సానుకూల కమిటీని ఏర్పాటు చేయాలన్నారు. బాధల నుంచి గట్టెక్కించాలనే అమరావతి రైతులు ఆందోళన చేస్తున్నారని చెప్పారు. రాజధాని అమరావతిని అంగుళం కూడా కదిలించలేరని ఈ సందర్భంగా రైతులతో సుజనా వ్యాఖ్యానించారు. సరైన సమయంలో కేంద్రం జోక్యం చేసుకుంటుందనే నమ్మకం తనకుందని.. అమరావతి విషయంలో న్యాయ, రాజ్యాంగపరంగా ముందుకెళ్తామని చెప్పారు. అభివృద్ధి పేరుతో కాలయాపన తప్ప జగన్‌ చేసేదేమీ లేదని ఆయన ఆరోపించారు. రేపు ఉపరాష్ట్రపతి వెంకయ్యనాయుడితో రైతులు, ఐకాస నేతలు భేటీ కానున్నారు.