వీడియో: దూడ కోసం 5 కి.మీ..!

ఇంటర్నెట్‌డెస్క్‌: సంగారెడ్డి జిల్లా హత్నూర మండలం మంగాపురంలో ఓ ఆవు తల్లి ప్రేమను చాటుకుంది. మహమ్మద్‌ పాషా అనే రైతు తన వద్ద ఉన్న నాలుగు ఆవులను అమ్ముదామని నర్సాపూర్‌ సంతకు తీసుకెళ్లేందుకు సిద్ధమయ్యాడు. వాహనంలో మూడు ఆవులను ఎక్కించగా ఓ ఆవు మాత్రం మొరాయించి వాహనంలో ఎక్కలేదు. దీంతో ఆ ఆవు దూడను తీసుకెళ్తే ఆవు కూడా వస్తుందని ఆలోచించాడు. మిత్రుడి సాయంతో దూడను తీసుకొని ద్విచక్ర వాహనంపై బయలు దేరగా తన బిడ్డను ఎత్తుకెళ్తున్నారని భావించిన ఆవు మనసు తల్లడిల్లిపోయింది. దాదాపు అయిదు కిలోమీటర్ల మేర దూరం పరుగెత్తింది. ఆ దృశ్యాన్ని చూసి ప్రజలు తల్లి ప్రేమ ఎంత గొప్పదో అని మురిసిపోయారు.