ఇకపై తమిళనాడు బస్సుల్లో సీసీ టీవీ కెమెరాలు

చెన్నై: బస్సుల్లో ప్రయాణించే మహిళలను, యువతులను ఇబ్బంది పెట్టే ఆకతాయిల ఆటలు ఇక తమిళనాడులో సాగవు. ఇకపై రాష్ట్రంలోని అన్ని బస్సుల్లో సీసీ టీవీ కెమేరాలను ఏర్పాటు చేయనున్నట్టు తమిళనాడు ఉప ముఖ్యమంత్రి పన్నీర్‌ సెల్వం తెలిపారు. రాష్ట్ర అసెంబ్లీలో 2020-21 బడ్జెట్‌ను ఆయన ఈ రోజు ప్రవేశపెట్టారు. ఈ సందర్భంగా ప్రసంగిస్తూ... బస్సుల్లో మహిళల భద్రతను పెంపొందించేందుకు ఈ చర్య తీసుకుంటున్నట్టు ఆయన ప్రకటించారు. ఇందుకు రూ.75.02కోట్లను నిర్భయ నిధి నుంచి కేటాయిస్తామని కూడా ఆయన వివరించారు. కాగా  2020-21 బడ్జెట్‌లో రవాణా శాఖకు రూ.2,716.26కోట్లను కేటాయించారు. అంతేకాకుండా నగదు రహిత లావాదేవీలను ప్రోత్సహించేందుకు తమిళనాడు రవాణా శాఖలో ఎలక్ట్రానిక్‌ టికెటింగ్‌ విధానాన్ని కూడా ప్రవేశపెట్టనున్నారు.