రైతులను తాకుతూ వెళ్లిన వైకాపా ఎంపీ వాహనం

అమరావతి: వైకాపాకు చెందిన బాపట్ల ఎంపీ నందిగం సురేశ్‌ వాహనం రోడ్డు పక్కన నిలుచున్న రాజధాని రైతులను తాకుతూ వెళ్లింది. మూడు రాజధానులకు వ్యతిరేకంగా నిర్వహిస్తున్న నిరసనల్లో భాగంగా రైతులు అమరావతి ఆలయానికి వెళ్లారు. అనంతరం రోడ్డు పక్కన రైతులు నిలుచుని ఉన్న సమయంలో అటుగా వచ్చిన ఎంపీ నందిగం సురేశ్ వాహనం రైతులను తగులుకుంటూ వెళ్లింది. వాహనం తాకుతూ వెళ్లడంతో తుళ్లూరుకు చెందిన రైతు తాడికొండ హనుమంతరావు కిందపడిపోయారు. ఈ ప్రమాదంలో అతని కుడికాలు చిటికిన వేలికి గాయమైంది. సహచర రైతులు అతన్ని సమీపంలోని ఆస్పత్రికి తరలించారు. ఘటన జరిగిన సమయంలో ఎంపీ సురేశ్ కారులోనే ఉండటం గమనార్హం.