ఎన్‌జీటీలో బయోమెట్రిక్‌ తాత్కాలిక రద్దు

దిల్లీ: కరోనా వైరస్‌ వేగంగా విస్తరిస్తున్న క్రమంలో ఎన్‌జీటీ(నేషనల్‌ గ్రీన్‌ ట్రైబ్యూనల్‌) ముందస్తు చర్యలు చేపట్టింది. దిల్లీలోని ఎన్‌జీటీ ప్రధాన కార్యాలయంలో ఉద్యోగులు హాజరును బయోమెట్రిక్‌ యంత్రంలో వేయాల్సిన అవసరం లేదని ప్రకటించింది. కరోనా వైరస్‌ వ్యాప్తిని అడ్డుకునేందుకే ఈ నిర్ణయం తీసుకున్నట్లు తెలిపింది. బయోమెట్రిక్‌ వ్యవస్థను తాత్కాలికంగా నిలిపివేయాలంటూ దిల్లీ ప్రభుత్వం అన్ని ప్రభుత్వ విభాగాలతో పాటు కార్యాలయాలకు గతంలోనే ఆదేశాలు జారీ చేసింది. ఈ నేపథ్యంలో ఇక నుంచి ఉద్యోగులకు కార్యాలయానికి వచ్చిన సమయంతో పాటు వెళ్లిన సమయాన్ని మాన్యువల్‌(చేతి పుస్తకంలో రాయడం) ద్వారా నమోదు చేయాలని ఎన్‌జీటీ సూచించింది. మార్చి 31 వరకూ ఈ విధానం అమలులో ఉంటుందని తెలిపింది.

బయోమెట్రిక్‌ వ్యవస్థను నిలిపివేయాలంటూ కేంద్రప్రభుత్వం మార్చి 6నే అన్ని ప్రభుత్వ కార్యాలయాలను కోరింది. కర్ణాటకలో ఇప్పటికే బయోమెట్రిక్‌ను తాత్కాలికంగా నిలిపివేస్తున్నట్లు ఆ రాష్ట్ర వైద్యారోగ్యశాఖ ప్రకటించింది. ఇదిలా ఉండగా.. భారత్‌లో కరోనా బాధితుల సంఖ్య 41కు చేరింది. ప్రపంచ వ్యాప్తంగా ఇప్పటికే 3,300 మందికిపైగా ప్రాణాలు విడిచారు.