తెలంగాణలో 16నుంచి ఒంటిపూట బడులు

హైదరాబాద్‌: వేసవి తీవ్రత పెరుగుతున్నందున ఈ నెల 16 నుంచి ఒంటి పూట బడులు నిర్వహించాలని తెలంగాణ పాఠశాల విద్యాశాఖ నిర్ణయించింది. ఈ మేరకు పాఠశాల విద్యాశాఖ కమిషనర్‌ చిత్రా రామచంద్రన్‌ ఉత్తర్వులు జారీ చేశారు. ఈ నెల 16 నుంచి ఏప్రిల్‌ 23 వరకు రాష్ట్రంలోని ప్రభుత్వ, ప్రైవేటు పాఠశాలల్లో ఒంటి పూట బడులు నిర్వహించనున్నట్లు ఉత్తర్వుల్లో పేర్కొన్నారు. ఉదయం 8 గంటల నుంచి మధ్యాహ్నం 12.30 గంటల వరకు బడులు నడపాలని స్పష్టం చేశారు. ప్రభుత్వ పాఠశాలల్లోని విద్యార్థులకు 12.30 గంటలకు మధ్యాహ్న భోజనం పెట్టి పంపించాలని పేర్కొన్నారు. ఏప్రిల్‌ 24 నుంచి విద్యాశాఖ వేసవి సెలవులు ప్రకటించింది.