ఆరు నెలల రేషన్‌ సరకులు ముందుగానే

దిల్లీ: కరోనా వ్యాప్తిని నియంత్రించే దిశగా కేంద్ర పౌరసరఫరాల శాఖ అప్రమత్తమైంది. లబ్దిదారులు ఆరు నెలలకు సరిపడా రేషన్‌ సరకులను ఒకేసారి తెచ్చుకునేందుకు వీలుగా అవకాశం కల్పించనుంది. ఈ విధానాన్ని పంజాబ్‌ ప్రభుత్వం ఇప్పటికే అమలు చేస్తోంది. గరిష్ఠంగా రెండు నెలలకు మాత్రమే సరకులు తీసుకునేందుకు ప్రస్తుతం అవకాశం ఉంది. అయితే కరోనాను కట్టడి చేసే చర్యలలో భాగంగా ఈ నిర్ణయం తీసుకుంది.  ఈ మేరకు అన్ని రాష్ట్రాలకు, కేంద్రపాలిత ప్రాంతాలకు మార్గదర్శకాలు జారీ చేశామని కేంద్ర పౌరసరఫరాల శాఖామంత్రి రాం విలాస్‌ పాసవాన్‌ తెలిపారు. కరోనా నేపథ్యంలో రేషన్‌ దుకాణాల వద్ద తగిన చర్యలు చేపట్టాలని సూచించారు. దేశవ్యాప్తంగా 75 కోట్ల మంది ప్రజలు ప్రజాపంపిణీ వ్యవస్థ నుంచి లబ్ధి పొందుతున్నారు.