కార్మికులకు జీతాలు ఇవ్వండి: మంత్రి మల్లారెడ్డి

హైదరాబాద్‌: కరోనా వైరస్‌ వ్యాప్తికి అడ్డుకట్ట వేసే క్రమంలో దేశవ్యాప్తంగా లాక్‌డౌన్‌ ప్రకటించిన సంగతి తెలిసిందే. తెలంగాణలోనూ లాక్‌డౌన్‌ కొనసాగుతోంది. దీంతో పలు కంపెనీలు, ఫ్యాక్టరీలు తాత్కాలికంగా మూతబడ్డాయి. ఈ నేపథ్యంలో తెలంగాణలోని కంపెనీలు, వివిధ సంస్థలు, కర్మాగారాల్లో పనిచేసే కార్మికులకు యాజమాన్యాలు జీతాలు చెల్లించాలని తెలంగాణ కార్మికశాఖ మంత్రి మల్లారెడ్డి ఆదేశించారు. శనివారం ఆయన కార్మికుల పరిస్థితిపై సమీక్ష నిర్వహించారు. అనంతరం మల్లారెడ్డి మాట్లాడుతూ.. ‘భవన నిర్మాణ కార్మికుల విషయంలో బిల్డర్స్‌ ఉదారంగా వ్యవహరించాలి.కార్మికులకు నిత్యావసరాలతో పాటు వసతి కల్పించాలి. అసంఘటిత కార్మికులను గుర్తించి వసతి, భోజన సౌకర్యాలు కల్పించాలి. సౌకర్యాలు అందేలాకార్మికశాఖ ముఖ్య కార్యదర్శి చర్యలు తీసుకోవాలి. కార్మికులు కార్మికశాఖ లేదా నోడల్‌ అధికారులకు వివరాలు ఇవ్వాలి’ అని అన్నారు.