కరోనా రోగి టిక్‌టాక్‌ వీడియో

సహకరించిన ముగ్గురి సస్పెన్షన్‌

 చెన్నై: కరోనా బాధిత మహిళ చేసిన టిక్‌టాక్‌ వీడియోకు సహకరించిన ముగ్గురు పారిశుద్ధ్య సిబ్బందని సస్పెండ్‌ చేసిన ఘటన తమిళనాడులో చోటుచేసుకుంది. అరియలూరు ప్రభుత్వ ఆసుపత్రిలో కరోనా రోగి ఒకరు ఇటీవల టిక్‌టాక్‌ వీడియో చేయడానికి ముగ్గురు పారిశుద్ధ్య సిబ్బంది సహకరించారు. వీరు బాధిత మహిళ టిక్‌టాక్‌ చేస్తుండగా సెల్‌ఫోన్‌లో చిత్రీకరించారు. అనంతరం ఆమెతో సెల్ఫీ దిగారు. ఐసొలేషన్‌ వార్డులో సెల్‌ఫోన్‌కు అనుమతి లేకపోయినా మహిళ పట్టుబట్టడంతో ఫోన్‌ ఇచ్చామని పారిశుద్ధ్య సిబ్బంది చెప్పినట్లు ఆసుపత్రి వర్గాలు పేర్కొన్నాయి. ఫాలోవర్లు తనను మరచిపోతారనే కారణంతో ఇలా వీడియో చేశానని కరోనా బాధితురాలు పేర్కొన్నట్లు తెలిపాయి. ముగ్గురు సిబ్బందిని విధుల నుంచి తొలగించిన అధికారులు అనంతరం వారిని క్వారంటైన్‌కు తరలించారు.