ఇంట్లోనే కరోనా పరీక్ష!

కరోనా సోకిందో లేదోననే విషయాన్ని ఇంట్లోనే ఉండి... నిమిషాల్లోనే తెలుసుకోవచ్చు. అందుకోసం ప్రత్యేక పరీక్ష కిట్లను బయోనె అనే సంస్థ ఆవిష్కరించింది. వీటితో నిర్వహించే పరీక్షల్లో కచ్చితమైన ఫలితాలు వస్తాయని, ఈ కిట్లకు భారత వైద్య పరిశోధన మండలి(ఐసీఎంఆర్‌) ఆమోదం లభించిందని ఆ సంస్థ ప్రతినిధులు చెప్పారు. ప్రపంచవ్యాప్తంగా ఉన్న భాగస్వామ్య సంస్థల సహకారంతో ఈ సరికొత్త పరీక్ష కిట్లను రూపొందించినట్లు, నాణ్యత పరమైన కఠిన పరిశీలనల తర్వాత మార్కెట్లోకి తీసుకురానున్నట్లు వెల్లడించారు. బెంగళూరు కేంద్రంగా పనిచేసే బయోనె సంస్థ జన్యు, సూక్ష్మజీవుల పరిణామాలకు సంబంధించి పలు పరీక్షలను, పరిశోధనలను సాగిస్తోంది.