కరోనా పోరు: మనమంతా మారాలి

గళమెత్తిన కళాకారులు 
పాటలతో విస్తృత ప్రచారం 

హైదరాబాద్‌: కరోనా మహమ్మారి కోరలు చాస్తోంది. ఈ వైరస్‌ విజృంభణతో ప్రపంచమంతా వణికిపోతోంది. కొవిడ్‌-19పై ప్రజలు అప్రమత్తంగా ఉండాలని ప్రభుత్వాలు, నాయకులు, అధికారులు తీవ్రంగా ప్రచారం చేస్తున్నారు.  కరోనాపై పోరులో ముఖ్యంగా వైద్య సిబ్బంది, పోలీసులు, పారిశుద్ధ్య కార్మికులు తదితరులు నిరంతరం శ్రమిస్తున్నారు. కరోనా బాధితుల సహాయార్థం సాధారణ వ్యక్తుల నుంచి ప్రముఖులు, స్వచ్ఛంద సంస్థలు తమ వంతు కృషి చేస్తున్నాయి. దీంతోపాటు కవులు, కళాకారులు తమ గళాన్ని వినిపిస్తూ కరోనాపై అవగాహన కల్పిస్తున్నారు. దీనిలో భాగంగా చిత్ర పరిశ్రమలో పని చేస్తోన్న సాంకేతిక విభాగానికి చెందిన యువత గళమెత్తింది. ఈ బృందం స్వరపరిచిన‘మనమంతా మారాలి’అనే గీతం అందరినీ ఆకట్టుకుంటోంది. రంగారెడ్డి జిల్లా పోచారానికి చెందిన ప్రజానాట్యమండలి రచయిత, ఆర్టీసీ విశ్రాంత ఉద్యోగి బండి సత్తన్న తమ కుటుంబ సభ్యులతో కలిసి జానపద బాణీలతో ఆలపించిన పాట అందరినీ ఆలోచింపజేసేలా ఉంది.