తమిళనాడులో వెయ్యి దాటిన కరోనా కేసులు

చెన్నై: తమిళనాడులో కరోనా పాజిటివ్‌ కేసుల సంఖ్య ఒక్కసారిగా పెరిగింది. ఆదివారం ఒక్కరోజే రాష్ట్ర వ్యాప్తంగా కొత్తగా 106 పాజిటివ్‌ కేసులు నమోదు కాగా.. ఒకరు మృతి చెందినట్లు రాష్ట్ర వైద్యారోగ్యశాఖ కార్యదర్శి బీల రాజేశ్‌ వెల్లడించారు. పాజిటివ్‌గా తేలినవారిలో ఎనిమిది మంది వైద్యులు, ఐదుగురు నర్సులు ఉన్నట్లు పేర్కొన్నారు. దీంతో ఇప్పటివరకు కరోనా బారినపడ్డ వారి సంఖ్య మొత్తం 1,075కి చేరినట్లు చెప్పారు. 11 మంది కన్నుమూసినట్లు తెలిపారు. ‘రాష్ట్రంలో కరోనా పరీక్షల నిర్వహణ సామర్థ్యాన్ని పెంచాం. మొత్తం 23 పరీక్షా కేంద్రాలు ఏర్పాటు చేశాం. సరిపడా టెస్టింగ్‌ కిట్లు అందుబాటులో ఉన్నాయి’ అని రాజేశ్‌ తెలిపారు. ఆదివారం ఆరుగురితో కలిపి రాష్ట్రంలో ఇప్పటివరకు 50 మందిని డిశ్చార్జ్‌ చేసినట్లు వెల్లడించారు.