కరోనా వైరస్‌ను ల్యాబ్‌లో సృష్టించలేదు

డబ్ల్యూహెచ్‌ఓ కూడా ఇదే తెలిపింది: చైనా

బీజింగ్‌: కరోనా వైరస్‌ను ల్యాబ్‌లో సృష్టించినట్లు ఎటువంటి ఆధారాలు లేవని ప్రపంచ ఆరోగ్య సంస్థ(డబ్ల్యూహెచ్‌ఓ) ఇదివరకే స్పష్టం చేసినట్లు చైనా విదేశాంగశాఖ పేర్కొంది. ఈ మహమ్మారి తొలుతగా ఆ దేశంలోని వుహాన్‌ నగరంలో వెలుగుచూసిన విషయం తెలిసిందే. అక్కడే ఓ ల్యాబ్‌లో కరోనా వైరస్‌ను సృష్టించారనే ఆరోపణలను సదరు శాఖ అధికార ప్రతినిధి ఒకరు గురువారం ఈ మేరకు ఖండించారు. మరోవైపు అమెరికా అధ్యక్షుడు డొనాల్డ్‌ ట్రంప్‌ బుధవారం ఈ విషయమై మాట్లాడుతూ తమ ప్రభుత్వం.. కరోనా వైరస్‌ ల్యాబ్‌ నుంచి వ్యాప్తి చెందిందా అనే విషయాన్ని తేల్చే పనిలో ఉందన్నారు. ఈ వ్యవహారంలో చైనా నిజానిజాలు వెల్లడించాలని స్టేట్‌ సెక్రెటరీ మైక్‌ పాంపియో డిమాండ్‌ చేశారు. కరోనా వ్యాప్తికి సంబంధించిన సమాచార వెల్లడిలో నిర్లక్ష్యంగా వ్యవహరించినట్లు చైనాపై విమర్శలు వస్తున్న విషయం తెలిసిందే.