3.12 లక్షల వలస కార్మికులను గుర్తించాం

తెలంగాణ పౌరసరఫరాల శాఖ ఛైర్మన్‌ మారెడ్డి శ్రీనివాస్‌రెడ్డి

హైదరాబాద్‌: రాష్ట్రంలో లాక్‌డౌన్‌ కారణంగా ఉపాధి కోల్పోయిన 3.12 లక్షల మంది వలస కార్మికులను గుర్తించినట్లు తెలంగాణ పౌర సరఫరాల కార్పొరేషన్‌ ఛైర్మన్‌ శ్రీనివాస్‌రెడ్డి తెలిపారు. హైదరాబాద్‌లో ఆయన మాట్లాడుతూ.. వలస కార్మికులందరికీ రెండో విడతగా బియ్యంతో పాటు రూ.500 పంపిణీ చేస్తున్నామన్నారు. 

రేషన్ కార్డు దారులకు ఇస్తున్న రూ.1500 పరిహారం ఇప్పటి వరకు బ్యాంకుల్లో పడని వారికి పోస్ట్ ఆఫీస్ ద్వారా అందిస్తున్నట్లు చెప్పారు. 5.21 లక్షల మందికి పోస్ట్ ఆఫీస్ ద్వారా పంపిణీ చేస్తామన్నారు. బ్యాంకు ఖాతాల్లో జమ అయిన రూ.1500 బ్యాంకు నుండి మళ్లీ వెనక్కి వెళ్లిపోతాయన్న అపోహలు అవసరం లేదని చెప్పారు. కందిపప్పు గురించి కేంద్రానికి లేఖ రాశామని, రాగానే అందరికీ పంపిణీ చేస్తామని తెలిపారు. రేషన్ కార్డులు లేనివాళ్ల గురించి రేపు క్యాబినెట్‌లో చర్చించి నిర్ణయం తీసుకుంటారని ఆయన తెలిపారు.