విదేశీ డాలర్ల కొనుగోలు పేరిట మోసం

దిల్లీ కేంద్రంగా గాజియాబాద్‌ ముఠా దందా

ఈనాడు, హైదరాబాద్‌: ‘మీరు పెట్టే పెట్టుబడితో ఆన్‌లైన్‌ ట్రేడింగ్‌ ద్వారా విదేశీ డాలర్లు కొనుగోలు చేస్తాం.. మీ పెట్టుబడిపై ఒక్క నెలకే 7-10 శాతం లాభాలొస్తాయి. ఏడాది తిరిగే సరికి మీ డబ్బు రెట్టింపవుతుంది’ అంటూ ఓ ఘరానా ముఠా రూ.కోట్లు కొల్లగొట్టింది. తెలంగాణలో మూడేళ్లుగా పదుల సంఖ్యలో బాధితుల నుంచి రూ.కోట్లలో డబ్బు వసూలు చేసిన ముఠా కార్యకలాపాలపై తాజాగా సీఐడీకి ఫిర్యాదు అందింది. గాజియాబాద్‌కు చెందిన ముఠా దిల్లీ కేంద్రంగా ఈ దందా సాగించినట్లు ప్రాథమికంగా గుర్తించిన సీఐడీ పోలీసులు ఆ రెండు ప్రాంతాలతోపాటు బెంగళూరుకు చెందిన సూత్రధారుల కోసం వేట ప్రారంభించారు. కరీంనగర్‌ జిల్లా హుజూరాబాద్‌కి చెందిన ఓ వ్యాపారి ఈ ముఠా బారిన పడి సర్వం కోల్పోయారు. 2017లో కొందరు మధ్యవర్తులు ఇతడికి.. మలేసియా నుంచి కార్యకలాపాలు సాగిస్తున్న ఓ ప్రముఖ సంస్థ ద్వారా ఫారెక్స్‌ ట్రేడింగ్‌ చేస్తే భారీగా లాభాలొస్తాయని ఆశ చూపడంతో కొంత పెట్టుబడి పెట్టారు. రెండేళ్లలో అతడి నుంచి ఏకంగా రూ.1.03 కోట్లు రాబట్టారు. ఏడాది కాలంగా ఆ సంస్థ ప్రతినిధులు మొహం చాటేస్తూ రావడం, అప్పులిచ్చిన వారి నుంచి ఒత్తిడి పెరగడంతో ఆయన ఇటీవల సీఐడీకి ఫిర్యాదు చేశారు.  గాజియాబాద్‌ ముఠా నకిలీ వెబ్‌సైట్‌ను సృష్టించి లావాదేవీలు చేసినట్లు పోలీసుల ప్రాథమిక దర్యాప్తులో తేలింది. బాధితుల్లో పలువురు ప్రభుత్వ ఉద్యోగులు, ఆర్మీ జవాన్లు ఉండడంతో ఫిర్యాదు చేసేందుకు ఎవరూ ముందుకు రావడం లేదని సమాచారం.