తెలంగాణలో ఇంటర్‌ మూల్యాంకనం ప్రారంభం

హైదరాబాద్‌: తెలంగాణలో ఇవాళ్టి నుంచి ఇంటర్మీడియెట్‌ జవాబుపత్రాల మూల్యాంకనం ప్రారంభమైంది. గన్‌ఫౌండ్రీలోని మహబూబియా కళాశాలలో ఏర్పాటు చేసిన కేంద్రంలో సిబ్బంది ఈ ఉదయం విధులకు హాజరయ్యారు.  ముందుగా రెండో సంవత్సరం, ఆతర్వాత మొదటి సంవత్సరం సమాధాన పత్రాల మూల్యాంకనం కొనసాగనుంది. కరోనా నేపథ్యంలో మూల్యాంకన కేంద్రాలను 12 నుంచి 33కి పెంచారు.
మొత్తం 9.50లక్షల మంది విద్యార్థులకు చెందిన 55 లక్షల జవాబు పత్రాలను 15వేల మంది అధ్యాపకులు మూల్యాంకనం చేయనున్నారు. కరోనా నివారణ జాగ్రత్తలు తీసుకుంటూ సిబ్బంది విధులు నిర్వహిస్తున్నారు. విధుల్లో పాల్గొనే ఉద్యోగులకు రవాణా, వసతి సదుపాయాలు కల్పించినట్టు అధికారులు వెల్లడించారు. ఒక్కో ఉద్యోగికి 3 మాస్క్‌లు, వ్యక్తిగత శానిటైజర్లు, పోలీసు పాస్‌లు అందజేశారు. మూల్యాంకన కేంద్రాల్లో రోజూ శానిటైజేషన్‌, ఫాగింగ్‌ చేపట్టనున్నారు. జూన్‌ రెండో వారంలో ఇంటర్‌ ఫలితాలు ప్రకటించే అవకాశముంది.