ఏపీఎస్‌ఆర్టీసీ ఆన్‌లైన్‌ రిజర్వేషన్ ప్రారంభం

అమరావతి: ఆంధ్రప్రదేశ్‌లో ఆర్టీసీ బస్సు సర్వీసులు రేపు ఉదయం నుంచి నడవనున్న నేపథ్యంలో ఏపీఎస్‌ఆర్టీసీ ఆన్‌లైన్‌ రిజర్వేషన్లను ప్రారంభించింది. రిజర్వేషన్‌ చేసుకున్నవారినే బస్సుల్లో ప్రయాణించేందుకు అనుమతిస్తామని ఆర్టీసీ స్పష్టం చేసింది. ఈ మేరకు పలు ప్రాంతాలకు నడిచే బస్సుల వివరాలను ఏపీఎస్‌ఆర్టీసీ తన వెబ్‌సైట్‌లో పొందుపర్చింది. ప్రయాణికులు apsrtconline.in వెబ్‌సైట్‌లో టికెట్‌ రిజర్వేషన్‌ చేసుకోవచ్చని సూచించింది. అయితే నిర్ణీత ప్రాంతాల మధ్య కొన్ని సర్వీసులను మాత్రమే నడపనున్నట్లు ఆర్టీసీ పేర్కొంది. విజయవాడ-విశాఖ మధ్య రేపు 1 ఏసీ, 6 సూపర్‌ లగ్జరీ బస్సులను నడపనున్నట్లు తెలిపింది. సూపర్‌ లగ్జరీ బస్సుల్లో కేవలం 18 సీట్లకే రిజర్వేషన్‌ చేసుకునేందుకు అనుమతించినట్లు ఏపీఎస్‌ఆర్టీసీ వివరించింది.