పెళ్లికి ముందు వివాహేతర సంబంధం... అత్యాచారం కాదు

కటక్‌ (ఒడిశా), న్యూస్‌టుడే: పెళ్లి చేసుకుంటానని ప్రలోభ పెట్టి యువతితో వివాహేతర సంబంధం నెరపడం అత్యాచారంగా పరిగణించరాదని ఒడిశా హైకోర్టు అభిప్రాయపడింది. ఒడిశాలోని కొరాపుట్‌ జిల్లా పొట్టంగి ఠాణాలో నమోదైన కేసు విచారణ సందర్భంగా శనివారం హైకోర్టు జస్టిస్‌ ఎస్‌.కె.పాణిగ్రహి నేతృత్వంలోని ధర్మాసనం ఇలా పేర్కొంది. ‘పెళ్లి చేసుకుంటామని భావించిన కొందరు శారీరకంగానూ కలుస్తున్నారు. యువకుడు పెళ్లికి నిరాకరిస్తే అత్యాచారం జరిగిందని యువతులు ఠాణాల్లో ఫిర్యాదు చేస్తున్నారు. ఇలాంటి ఘటనలను అత్యాచారాలుగా పరిగణించరాద’ని కోర్టు అభిప్రాయపడింది. 2019లో పొట్టంగి ఠాణా పరిధిలో ఓ యువకుడు తనతో శారీరక  సంబంధం పెట్టుకొని.. తర్వాత పెళ్లికి నిరాకరించాడని యువతి పోలీసులకు ఫిర్యాదు చేసింది. యువకుడ్ని పోలీసులు అరెస్టు చేశారు. శనివారం విచారణ చేపట్టిన హైకోర్టు బెయిల్‌ మంజూరు చేస్తూ పైవిధంగా అభిప్రాయపడింది.