కలుషిత ఆహారం తిని 22మందికి అస్వస్థత

విషమంగా ముగ్గురు చిన్నారుల పరిస్థితి

ఉట్నూరు‌ గ్రామీణం: ఆదిలాబాద్‌ జిల్లా ఉట్నూరు మండలం శ్యామ్‌నాయక్‌ తండాలో కలుషిత ఆహారం తిన్న 22మంది అస్వస్థతకు గురయ్యారు. బాధితులు తెలిపిన వివరాల ప్రకారం.. మంగళవారం రాత్రి ఓ కుటుంబంలో స్థానిక సంప్రదాయ పూజ(దసరా) నిర్వహించారు. ఈ సందర్భంగా రాత్రి సమర్పించిన నైవేద్యాన్ని బుధవారం ఉదయం ఆ కుటుంబంతో పాటు చుట్టుపక్కల వారు ప్రసాదంగా స్వీకరించారు. ఆ ప్రసాదం తిన్న కొద్ది గంటల వ్యవధిలోనే దాదాపు 22 మందికి వాంతులు, విరేచనాలు కావడంతో హుటాహుటిన వారిని ఉట్నూరు‌ ఆస్పత్రికి తరలించారు. బాధితుల్లో ఏడుగురు చిన్నారులు, 8 మంది మహిళలు ఉన్నారు. వారిలో చిన్నారులు రిషిత(3), నైనక్‌(2), సూరజ్‌(3)ల పరిస్థితి విషమంగా ఉండటంతో ఆదిలాబాద్‌ రిమ్స్‌కు తరలించారు. విషయం తెలుసుకున్న ఉట్నూరు ఆర్డీవో వినోద్‌కుమార్‌, తహసీల్దార్‌ చంద్రశేఖర్‌ ఆస్పత్రికి చేరుకుని బాధితులను పరామర్శించారు.