తెలంగాణలో డిగ్రీ, పీజీ పరీక్షలపై క్లారిటీ

మార్గదర్శకాలు జారీ చేసిన ఉన్నత విద్యామండలి

హైదరాబాద్: కరోనా వ్యాప్తి నేపథ్యంలో తెలంగాణలో వాయిదా పడిన డిగ్రీ, పీజీ పరీక్షల నిర్వహణపై రాష్ట్రంలోని విశ్వవిద్యాలయాలకు రాష్ట్ర ఉన్నత విద్యామండలి పలు మార్గదర్శకాలు జారీ చేసింది. తుది సెమిస్టర్‌ పరీక్షలు మాత్రమే నిర్వహించాలని యూనివర్సిటీలకు సూచించింది. డిగ్రీ, పీజీ చివరి ఏడాది చదువుతున్న విద్యార్థులకు జూన్‌ 20 నుంచి పరీక్షలు నిర్వహించవచ్చని విశ్వవిద్యాలయాలకు ఉన్నత విద్యామండలి అనుమతి ఇచ్చింది. మిగతా సెమిస్టర్లకు నవంబర్‌ లేదా డిసెంబర్‌లో పరీక్షలు నిర్వహించాలని సూచించింది. పరీక్షా సమయాన్ని రెండు గంటలకు కుదించాలని.. ప్రశ్నాపత్రంలోనూ ఎక్కువ ఐచ్ఛికాలు ఇవ్వాలని తెలిపింది. అన్ని సెమిస్టర్‌ విద్యార్థులకు పరీక్షలు లేకుండానే తాత్కాలికంగా ప్రమోట్‌ చేయాలని సూచించింది. ప్రాజెక్టులు, సెమినార్లు, వైవాలు ఆన్‌లైన్‌లోనే నిర్వహించాలని ఉన్నత విద్యామండలి స్పష్టం చేసింది.